| Simple Lang.... INCINERATOR |
 |
 |
 |
| Written by Ni Manny C. Calonzo Remate Tonight, 29 Hulyo 2010 |
| Thursday, 29 July 2010 03:24 |
|
Sa pagsisimula ng ika-15 Kongreso ay puspusan ang paghahahanda ng iba’t ibang kagawaran ng mga panukalang batas na kanilang ilalako sa mga kongresista at senador. Isang panukala mula sa Kagawaran ng Kalusugan (DOH) ang mabilis na hinadlangan ng mga grupong nagtataguyod ng kalusugang pampubliko at pangkalikasan. Ito ang panukalang rebisahin ang Clean Air Act (CAA) upang pahintulutan ang mga sinasabing “clean incinerator” o mga mamahaling makina na ginagamit na sunugan ng mga basura. Sa ilalim ng CAA ay ipinagbabawal ang pagsusunog ng mga basura mula sa mga bahay (solid waste), ospital (medical waste) at pabrika (industrial waste), kasama ang mga peligrosong basura (toxic waste), na naglalabas ng mga mapanganib at nakakalasong buga gaya ng dioxin, ang pinakamapanganib na lasong kemikal na gawa ng tao. Sa gitna ng pagtutol ng ilang negosyante at opisyales ng gobyerno ay nanaig sa puso ng mga mambabatas ang kahalagahan na mapangalagaan ang lipunan laban sa polusyon at gastos mula sa pagsusunog ng basura at maitulak ang mga tunay na solusyon. Pero, tulad ng mga makukulit na lamok, ay walang tigil ang pagpupumilit ng iilan na palabnawin o tuwirang baguhin ang patakarang ito na nakapaloob na sa dalawang pangunahing batas: ang CAA at ang Ecological Solid Waste Management Act. Sa kanilang sulat kay Secretary Ona, ipinahayag ng Health Care Without Harm, EcoWaste Coalition, Global Alliance for Incinerator Alternatives at Greenpeace ang mariing pagtutol na baligtarin ang batas, laluna may iba’t ibang ligtas, epektibo at hindi magastos na mga alternatibo upang ekolohikal na mapangasiwaan ang iba’t ibang uri ng mga basura. Peligroso ang panukala ng DOH na kung hindi babawiin ni Secretary Ona ay posibleng magsilbing daan upang talikuran ang pambansang patakaran kontra pagsusunog ng basura. Mahirap maunawaan kung bakit itinutulak ito ng ilang kawani ng DOH samantalang alam nila na taon-taon hanggan 2014 ay nagbabayad ang Pilipinas sa Austria ng 2 milyong dolyar kada taon bilang bayad sa mga depektibong incinerator na “high-tech” o “state of the art” daw na napatunayan mismo sa pagsusuri ng DOH at WHO na nagbubuga ng lampas-lampas na antas ng dioxin! Sa isang talumpati nitong Hulyo 26 ay inisa-isa ni Annie Leonard (tagapagbuo ng GAIA at aktibistang bida sa “The Story of Stuff”) ang mga dahilan kung bakit hindi katanggap-tanggap ang mga incinerator. Ilan sa kanyang mga nabanggit ang mga sumusunod: a. Sinasayang ng mga incinerator ang mga materyales na maaari pa sanang magamit muli o maibalik sa pabrika, merkado at sa kalikasan. b. Nagbubuga ang mga makinang ito ng daan-daang mga lasong kemikal tulad ng dioxin, mercury at iba pa, at lumilikha rin ng mapanganib na abo na ibinabaon sa mga tambakan. k.Hinihikayat nito ang patuloy na paglikha ng mga basura na ipinapakain sa mga masisibang makina, at hinahadlangan ang pag-iisip at pagpapatupad sa mga tunay na solusyon. d. Nilalamon nito ang pampublikong pondo na dapat sana ay gamitin para isulong ang lokal na ekonomiya, habang kakarampot lamang ang trabahong nalilikha mula sa pagsusunog ng basura. Imbes na baligtarin ang batas, palakasin pa sana ito upang mapairal ng walang pasubali ang mga ligtas na alternatibong solusyon na hindi magwawaldas ng mga rekurso at pondo ng bayan. |
| Last Updated on Thursday, 29 July 2010 03:26 |